今季英超爭霸出現決定性一幕，阿仙奴周日(10日)作客韋斯咸，領先情況下尾段飽受壓力，補時5分鐘主隊戲劇性射入追平，以為阿仙奴「臨尾香」斷送冠軍，不過VAR介入發現韋斯咸球員犯規，球證卡維拿治喺場邊睇17次重播後，最後判入球無效，而呢個「終極判決」好可能主宰今季英超冠軍！

失分少曼城2分嘅阿仙奴，只要贏晒自己嘅賽事就可以捧盃，今場作客為護級搏命嘅韋斯咸，被視為失分最高風險一戰。阿仙奴早段反客為主，李安度杜沙特曾頭槌中楣，不過28分鐘賓韋特傷出，阿仙奴被逼變陣後形勢急轉直下，完半場前大衞拉耶飛身撲出卡斯迪蘭奴斯插水式頭槌。

阿仙奴遲遲未入到波，領隊阿迪達再次變陣，後備上陣嘅馬田奧迪加特83分鐘殺入禁區，橫傳杜沙特射入關鍵一球。韋斯咸最後大反撲，補時5分鐘有戲劇性場面，門前大混戰中哥林威爾遜亂軍射入，但慢鏡顯示柏保路用手壓實大衞拉耶雙手，令佢未能接波，球證最終判入球無效，阿仙奴絕地逃生。

韋斯咸詐胡：https://x.com/i/status/2053612666762273219　

阿仙奴依家領先踢少1場嘅曼城5分，只要佢哋最後2場聯賽贏波，就肯定重奪英超冠軍。今場補時嘅「終極判決」極具決定性，阿仙奴領隊阿迪達賽後表示：「或者我今日先真正明白球證工作有幾難，呢個可能係決定歷史嘅時刻，球證喺巨大壓力下做出勇敢決定。呢個係非常明顯嘅犯規，我曾經都質疑VAR，但今日要讚佢哋畀機會球證再去決定。」

雖然今次韋斯咸犯規動作明顯，不過仍然有唔少爭議，尤其今季英超對侵犯門將尺度模糊，韋斯咸嘅查洛保雲就表示：「英超就係咁體力化，角球肯定有身體接觸，當球證睇VAR睇咗5分鐘，肯定會搵到問題，我覺得呢個判決唔啱。」

最強博彩盤路過關神器《串績王》：http://win.on.cc/football/